Hvað er andleg vakning?

Andleg vakning hefst þegar þú upplifir að líf þitt passi ekki lengur við það hver þú ert innra með þér. Þú ferð í gegnum rútínurna þína, talar við sama fólkið, lifir sömu mynstrum en eitthvað er á skjön við það sem áður var. Þú hættir að geta látið eins og ekkert sé.

Sál þín byrjar að ýta við þér, hljóðlega í fyrstu og segir þér að það sé meira til í lífinu en hlutverkin, væntingarnar og venjurnar sem þú hefur lifað eftir. Þegar þessi tilfinning vex byrjar sjálfsmyndin sem þú hefur byggt upp í gegnum árin að losna. Þú ferð að taka eftir því hvernig þú hefur verið að fela hluta af sjálfri þér. Þú sérð hversu stór hluti af lífi þínu kom frá ótta, að lifa af eða þóknast öðrum. Andleg vakning brýtur þessa gömlu sjálfsmynd vegna þess að hún getur ekki leitt þig inn í næsta kafla lífs þíns. Hin raunverulega þú er að reyna að koma fram. Þetta er þegar tilfinningarnar rísa. Tilfinningar sem þú hefur ýtt niður í mörg ár sem koma loksins upp til að losna. Gamlar minningar, gamall sársauki, gamlar hjartasorgir, vonbrigði, eftirsjá og reiði. Allt kemur þetta upp á yfirborðið vegna þess að kerfið þitt er að hreinsa út það sem ekki lengur þjónar tilgangi. Fólk grætur oft, finnur fyrir þreytu eða finnst allt yfirþyrmandi. Það er eðlilegur partur af ferlinu, þú ert einfaldlega að sleppa því sem þú hefur borið of lengi. Næmni þín fyrir fólki og umhverfinu eykst og þú byrjar að taka eftir orku fólks skýrar. Þú finnur sannleikann í líkama þínum án þess að efast, skynjar fyrirætlanir annarra og hættir að þola falskar tengingar eða þvingaðar aðstæður. Innsæi þitt verður háværara og leiðbeinir þér á þann hátt sem er óumdeilanlegur. Þessi næmni er ekki veikleiki heldur skýr meðvitund. Þín meðvitund!

Þú byrjar líka að sjá lífið á annan hátt. Öll mynstur verða augljós og þú ferð að upplifa samstillingar í formi talna (eins og 11:11, 777, 333 ofl). Þú tekur eftir því hvernig ákveðin hegðun endurtekur sig í fólkinu í kringum þig og þú sérð hversvegna ákveðin sambönd breyttust og liðu undir lok. Þú skilur hluta af sjálfri þér sem áður voru ruglingslegir og þú upplifir að þokunni létti og allt verði skýrara.

Þegar rykið sest kemur eitthvað dýpra fram og þú ferð að muna hver þú ert í raun og veru undir öllum skilyrðunum. Gildi þín og forgangsröðun breytist, hlutir sem áður skiptu máli skipta ekki lengur máli og hlutir sem þú hunsaðir finnst þér nú nauðsynlegir að skoða. Þú byrjar að velja heiðarleika, frið og fyrirgefningu fram yfir samþykki og meðvirkni.

Að lokum kemur þessi tilfinning um endurfæðingu - Þú finnur fyrir léttleika, skýrleika og meiri tengslum við þinn eigin sannleika. Þú talar og hreyfir þig öðruvísi og þú velur aðra hluti að fara eftir í lífinu. Heimurinn hefur ekki breyst, þú hefur breyst. Andleg vakning er þegar sál þín tekur forystuna og líf þitt byrjar að fylgja í kjölfarið. Þessi andlega vakning á sér stað vegna þess að þér er ekki lengur ætlað að lifa sem minni útgáfa af sjálfri þér. Þetta er breytingin sem dregur þig inn í þinn tilgang, tilganginn fyrir því að þú komst hingað, hvað þér er ætlað að læra og hver þú átt að verða. Endurkoma til sjálfs þíns!